Psa 104 | MNA | STEP | Leleŋ ko imap ipakur Yooba pa kampeŋana kini. O Yooba, Anutu tio, nu ta biibi ŋonoono. Mburom mi azuŋka ku, ramaki mbulu boozomen ta zom biibi pa i, ina iliu u ma iwe kembei ta mburu pu. Muŋgu kat, nu ur saamba ma iwe kembei saŋarai ta begeene ila molo na, bekena mbotmbot pa.

a1Tim 6:16

bIbr 1:7

cUn 7:19

dUn 9:15

eUn 1:11; Mbo 147:8

f2Tes 3:10+

gMt 6:26

Psalms 104

Mboe 104

Tapakur Merere. Pa ni ta iur saamba mi toono

1 Leleŋ ko imap ipakur Yooba pa kampeŋana kini.
O Yooba, Anutu tio, nu ta biibi ŋonoono.
Mburom mi azuŋka ku, ramaki mbulu boozomen ta zom biibi pa i, ina iliu u ma iwe kembei ta mburu pu.
Muŋgu kat, nu ur saamba ma iwe kembei saŋarai ta begeene ila molo na, bekena mbotmbot pa. ^a
3 Mi ur murim ise yok kor kana ŋwaana.
Mi miiri tieene, ta iwe lem karis be zze.
Tana miiri ikwarra u mi wwa pa maŋaanaŋana.
4 Nu ŋgoŋgo miiri ma ilala be ikam uraata ku.
Mi lolo ta iwenweene mi ikamam ma you iwedet, ta iwe lem mbesooŋo. ^b

5 Muŋgu nu ur toono ma imbot se uunu ta mbolŋana kat. Tana irao imuzik na som.
6 Mi nu kam ma tai ilol toono
mi zin abal ma timap. ^c
7 To maŋga mi kalŋom isala ma yaamba tai. Tabe iko pa toono.
Pa kalŋom na, mburaana biibi, kembei ta lele ikuruŋ i.
Tana tai ileŋ to, karau men mi iyaaru ma isula imbot muriini, mi toono raraazaŋana ipet.
8 Tai iyaaru ma isula na, izem toono mi abalabal ta boozomen ma timbot mat.
Mi yok rereereŋan tipet ma tila tizulla lele ŋgolooboŋan.
Pa ina murin ta nu ur pizin be timbotmbot pa.
9 Mi nu ur mbut pa tai mi toono. Mbut tana, tai irao imolo na som.
Tana tai ko irao izooro mi ilol toono mini na som. ^d

10 Nu ta kamam yok mbukmbukŋan ma tiwedet pa abal zilŋanzilŋan,
mi tirereere ma tizulla pa lele ŋgolooboŋan.
11 Yok tana timbotmbot be zin buzur su kan ta boozomen tiwin.
Mi zin doŋki saŋsaŋŋan ta miri zin na, zin tomini tiwin ma tirao.
12 Mi ke ta timendernder la yok kezenkezen na,
man tiwwo len ŋgini sala be timbotmbot pa mi titaŋtaŋ.
13 Nu mbotmbot murim ta kor a, mi kamam yaŋ ma izzu bekena pembesmbeeze zin abal.
Mi uraata ku tana ikamam ma toono ipiyotyooto koroŋ ambaimbaiŋan boozomen.

14 Nu kamam mbutmbuutu ma izze bekena zin mbili tikanan.
Mi ur koroŋ pakan pa niam tomtom be ampaaza ma iwe koyam kini. ^e
15 Nu ur koyam baen be ampaaza mi amwin ma leleyam ambai.
Mi kam ke olib piam, bekena amkam ka ŋgere, mi amsuulu yam pa ma ruŋguyam ambai.
Mi ur koyam kini bekena amkan ma ipombol yam.
16 Yooba, nu motom iŋgalŋgal ke ku bibip ta timbotmbot Lebanon na, mi kamam yaŋ ma izzu pizin. Tabe tise ma tiwe bibip.
Ke tana, nu itum ta paaza zin.
17 Ke tana namannaman na, man tiwwo len ŋgini isala.
Mi utenuten na, tiwe man kokomo murin.
18 Zin abal ta uten mololo na, mekmek saŋsaŋŋan timbotmbot sala.
Mi moozo tikewe lela toono sumbunsumbun ta timbotmbot dogo zilŋanzilŋan na.

19 Nu ta ur puulu bekena iwe seŋgaaŋa pa ndaama.
Mi zoŋ ta ur, ina iute nol tabe ise, mi nol tabe isula.
20 Mbeŋ na, nu kamam ma lele zugut,
bekena koroŋ su kan tipa.
21 Tana laion kalŋan izalla mi tiwwa pa mbeŋ
ma tirru kan buzur ta nu itum ur pizin na.
22 Mi sombe zoŋ ise, na timilmiili
ma tilala mini murin, mi tikenne lela.
23 Tonabe tomtom kadoono tiyotyooto pa ruumu kizin,
mi tilala ma tikamam uraata kizin ma irao zoŋ isula. ^f

24 O Yooba, nu ur koroŋ matakiŋa boozo.
Mi koroŋ boozomen ta nu ur na, ina tiswe kembei ŋgar ku biibi kat.
Toono ti bok pa koroŋ munŋaana ka tieene ta ur zin na.

25 Mi nio aŋkam ŋgar pa tai tomini. Ina biibi kat.
Mi koroŋ bibip mi munmun matakiŋa ta timbotmbot sula.
Tinin zin na tarao som.
26 Wooŋgo tikowo pa tai.
Mi Lebiatan, koroŋ zazaŋana ŋonoono ta muŋgu uri na, ta imbotmbot tai leleene mi izogzoogo lele.

27 Koroŋ ta munŋaana men tana, sombe petel zin,
na tiurur matan pu be kam kan kini.
28 Nu mborro zin, tanata tikanan kan kini.
Itum nomom, ta ipututu zin pa koroŋ ambaimbaiŋan ma kopon bok. ^g
29 Mi sombe turke motom pizin,
na tiseŋeeŋe ma tiru zalan.
Mi sombe kiskis zin som mi tatke bubuŋan pizin,
to timetmeete ma tiwe toono mini.
30 Zin buzur mi koroŋ matakiŋa ta timbotmbot su toono na, Bubuŋom ta ipiyotyooto popoŋana kizin ma tiwedet.
Gorgori nu kamam uraata,
tana popoŋana kizin iwedet su toono.

31 Yooba zaana biibi, ramaki mburaana mi azuŋka kini ko imbotmbot ma alok.
Mi ni ko leleene ambai pa uraata boozomen ta itunu namaana ikamam na.
32 Ni mburaana biibi kat. Sombe mataana isu pa toono risa, na yeŋyeeŋge itok toono.
Mi sombe iteege su pa zin abal, na you imaŋga raama ka koi.

33 Tana mazwaana ta so aŋbot motoŋ yaryaara na, kalŋoŋ ko izalla mi aŋbombo mboe pa Yooba.
Ko leleŋ ambai pa Anutu tio, mi aŋpakurkuri pa mboe ma irao meeteŋana tio.
34 Nio menmeen yo biibi pa Yooba.
Mi aŋsuŋi be ipazal ŋgar ta imbot la leleŋ i mi mboe tio ma irao pa itunu leleene.
35 Mi wal sananŋan mi wal zorzooroŋan na, leleŋ be ni ipambiriizi zin pa toono ma timap kat.
Leleŋ be kizin tasa imbot mini pepe.
Leleŋ ko imap ipakur Yooba!
Haleluya!